LA UNION – Lalo pay nga inirutan iti Northern Luzon Command (NOLCOM) ti Armed Forces of the Philippines (AFP) iti pananganop kadagiti amin a kameng ti Communist Party of the Philippines-New People’s Army (CPP-NPA) idiay Amianan a Luzon kasaruno iti panangideklara ni Pangulo Rodrigo Duterte a terrorist organization ti nadakamat a grupo dagiti rebelde.
Iti ekslusibo a pannakiuman ti Bombo Radyo La Union kenni Lt. Col. Isagani Nato, spokesperson ti NOLCOM, kinunana a sibubukel iti suporta iti Pwersa Armada ti Pilipinas iti inaramid a deklerasyon ti Pangulo kontra kadagiti nabirngasan a terorista.
Sigun kenni Nato, aramatenda ti sibubukel a pwersa tapno rippuugen ti CPP-NPA kangrunaan kadagiti lugar a nasaknap iti impluwensya dagitoy kas iti probinsya ti Cagayan, Abra, Kalinga, Isabela, Quirino, kadagiti boundaries ti Nueva Ecija ken Pangasinan.
Mapalawa met iti military operations kadagiti lugar a nakaro nga apektado iti aramid ti nasao a grupo.
Nakapsot met sigun iti opisyal, ti bileg iti CPP-NPA iti probinsya ti La Union gapu ta iti laeng babassit a grupo iti nasaripatpatan kadagiti kabanbantayan a paset nga asideg iti Cordillera Administrative Region (CAR).
Kinuna pay iti tagapagsarita ti NOLCOM, ipanamnama met iti militar a saanda a labsingen iti karbengan dagiti ligal a grupo wenno ti umbrella organization ti CPP-NPA kas iti National Democratic Front (NDF) a nawaya nga agipeksa iti karirikna, ngem mabalin a maaresto laeng dagitoy no adda ti labsingenda a linteg wenno addaanda iti warrant of arrest.
Iti mensahe pay ni Lt. Col. Nato kadagiti kameng ti CPP-NPA nga agtartarigagay a sumuko, silulukat kinunana ti militar, pulisya, ken dadduma pay nga organisasyon a mangawat kadagitoy.
Ipanamnama met ti gobyerno iti kinatalged dagiti agdisnudo a sumuko ken ti pagsapulan dagitoy tapno laeng tallikudan iti panangisaknap ti kinadamsak, ken agbiag a naulimek. (Absalom Flores)
