LA UNION – Isagsaganan ti pulisya iti kaso kontra ti maysa a driver a nangbagsol iti maysa a construction worker idiay Barangay Ipet, ili ti Sudipen, La Union.
Nabigbig ti biktima a ni Darnel Magpili, 26-anyos, residente iti Barangay Mindoro, ili ti Bangar, La Union.
Naammuan ti Bombo Radyo manipud iti Sudipen Police Station, maipagarup nga agin-inana ti biktima iti sango ti maysa a tarsena nga asideg iti construction site idi nga immasideg ti suspek a ni Apolonio Munio, 56-anyos, residente ti Barangay Ipet, kasaruno iti panangprobukar iti riribok ken pammagsol.
Napungtaan ti takyag ti biktima isu a naitaray daytoy idiay Tagudin District Hospital idiay ili ti Tagudin, Ilocos Sur.
Naaresto met ti suspek ken naala manipud iti ikotna ti kutsilyo a naaramat iti pammagsol. (Absalom Flores)
