LA UNION – Naglak-am iti sugat ti naduma-duma a paset iti bagida iti innem a tattao kalapsan a maaksidente ti maysa a van iti kawatiwatan ti national highway idiay Barangay Namboongan, ili ti Sto. Tomas, La Union.
Naammuan ti Bombo Radyo manipud iti Sto. Tomas Police Station, maipagarup a killaat a bimtak iti maysa a makisango a pilid ti van a manmanehuen ni Christian King Quitoras, 21, residente ti Pura, Tarlac isu a napasamak ti aksidente.
Nadayanggus pay ti maysa a bystander nga agnagan iti Ariel Laroza nga nakatakder laeng iti igid ti kalsada kasaruno iti pannakaidungpar daytoy iti waiting shed.
Dagus a naiturong idiay La Union Medical Center da Laroza ken ti driver ti van a ni Quitoras karaman dagiti agkakabagyan a pasehero nga isuda Michelle Morella, 23; Naneth Garcia, 35; Princess Jhona Garcia, 8; ken Bernida Morella, 59, agpapada a residente iti ili ti Pinili, Ilocos Norte.
Iti agdama, agtultuloy pay laeng iti imbestigasyon ti pulisya tapno maammuan iti sungsungbatan ti driver tinadakamat a lugan.
