LA UNION – Dackel a dayaw para iti Rosario Integrated School idiay Rosario, La Union iti panangabak dagiti estudyante da, iti naisayangkat a Po Leung Kuk International Year of Sustainable Tourism for Development Arts and Design Competetion idiay Hong Kong.
Daytoy ti sipapanakkel nga inwaragawag iti Bombo Radyo La Union ni School Principal Alicia Apricio.
Kinuna na a pakabuklan a 23 nga estudyante, manipud Grade 1 – Grade 11, iti nangabak iti 1st, 2nd, ken 3rd prize iti nasao a kompetisyon, manipud iti lima a kategorya.
Dagiti nangabak nga artworks dagiti estudyante ket iti sumaganad:
– Man’s Home
– Tree of Development
– Road Trip To Success
– Tourism and Development Lead a Heart
– Silver Lining
– Sustaining a Balance Society
– The Unity Ship
Nupay kasta, segun kenni Apricio a kadagiti 23 a nangabak nga estudyante, 16 laeng kadagitoy a nangabak iti 1st ken 2nd prize, iti nakatuding nga umawat ti award.
Nakatuding nga agturong iti bunggoy ti nasao a pagadalan idiay Hong Kong inton Marso 15, tapno awaten dagiti estudyante iti award, iti Exhibition Gallery a Sha Tin Town Hall.
Iti kangrunaan a tarigagay iti organiser ti kompetisyon a Po Leung Kuk ket tapno naan-anay a mapabaknang iti artistic potentials dagiti agtutubo ken maaddaan dagitoy ti tured a mangipakita iti bukod dagitoy a masterpice ken kultura iti nagduduma a pagilian.
