LA UNION – Sumagmamano metten nga aldaw kalpasan a saan a natuloy ti maaramid koma a ground breaking ceremony iti maipatakder a mini-hydroelectric power plant ken dam idiay Barangay Mamat-ing, ili ti Naguilian gapu iti maipagarup a tignay-protesta dagiti residente ket nangisayangkat dagitoy ti sabali manen a rally idiay sentro iti syudad ti San Fernando, La Union ittattay bigat.
Iti pannakiuman ti Bombo Radyo kenni Rolando Argueles, leader ti Timpuyog iti Marigrigat nga Umili ti Naguilian (TIMUN), kinunana a nangisayangkatda manen iti tignay-protesta tapno maipamatmat iti gobyerno ti nainget a panangkontrada iti nasao a proyekto.
Impaganetget ti grupo nga awan ti public hearing ken saanda a nangted iti pammalubos tapno agaramid ti dam iti bukodda a lugar.
Maipagarup nga arigna a naallilaw dagiti padana a mannalon kalpasan a nagpirma dagitoy iti nagrikos nga attendance sheets idiay lugarda ken saanda nga ammo nga aramaten daytoy para iti interest ti mangimatmaton iti proyekto.
Sigun pay kenni Argueles, saan met a nakailintegan a maipagarup a gatangen iti gobyerno ti dagada babaen ti balor a P5 per square meter gapu ta lalo nga agrigat dagitoy kabayatan nga agnam-ay met dagiti adda iti likudan ti nasao a negosyo.
Agdandanag met dagitoy gapu ta mabalin nga agpeggad iti pagsapulanda ken sanikuada no adda ti kalamidad.
Kabayatanna, umabot iti 50 a tattao manipud ti nasao nga ili ti nagturong iti syudad a tugot dagiti bukodda a karatula tapno ag-rally.
Naammuan a maipagarup a dumanon iti P1,506,577,675.00 ti nakalatang a pondo para iti pannakaaramid ti nasao a proyekto ti Mini-Hydro electric Corporation.
