LA UNION – Nakasagana ni La Union Governor Francisco Emmanuel ‘Pacoy’ Ortega III kadagiti pannubok ken karit iti panangidaulo daytoy, magun-od laeng iti tar-tarigagayan a mas nadurdur-as a probinsiya, nakaay-ayu ken natalged a pagnaedan, saan laeng a kadagiti residente ngem ketdi kadagiti pay bisita ken turista a dumaydayu ditoy La Union.
Daytoy ket saan a kari nudiket maysa a mandato ken responsibilidad nga inawat na idi maipatugaw iti puwesto kas ama ti probinsiya.
Ngem impaganetget na iti panagbetla na iti State of The Province Address (SOPA) idi kalman, a saan na a maaramid daytoy nu maymaysa na laeng ket kasapolan na iti tulong ken suporta ti tunggal maysa, iti Sangguniang Panlalawigan, dagiti component LGUs a mangbukbukel iti probinsiya, ken dadduma pay nga stakeholders.
Segun pay iti gobernador a sibubukel iti suporta na iti ‘build build build’ projects ti Duterte administration, a nakasentro kadagiti imprastruktura partikular iti pannaka-palawa iti kalsada.
Kalpasan kunana a makumpleto iti Tarlac-Pangasinan-La Union Expressway (TPLEx) a dimmanonen agingga idiay Rosario, mamati daytoy nga agtultuloy iti napintas a proyekto agingga idiay ili ti San Juan, a nabirngasan a ‘surfing capital of the north.’
Imapanakkel na pay iti maar-aramid a Bauang-San Fernando-San Juan bypass road, a segun kenkuana ket agbalin a fully functional by year 2022.
Kinuna na pay a kalpasan iti nadiskubre a problema ken isyu idiay isla ti Boracay agingga iti temporary closure, nagserbi daytoy nga eye opener iti lokal a gobyerno para iti mas nair-irut pay nga implementasyon dagiti linteg a mangaywan iti aglawlaw.
Gaputi dayta, impanakkel ni Gov. Ortega iti sudden surge of tourist arrivals iti probinsiya a kas laengen kunana iti panagdupudop dagiti adu a turista ken bisita ita laeng a bulan ti Mayo.
