LA UNION – Malamlamayan itan ti maysa a mister a natay kalpasan ti napasamak a panagdinnungpar ti motorsiklo ken traysikel idiay Barangay Rimos 2, ili ti Luna, La Union.
Nabigbig ti 29-anyos a natay a ni Romnick Llobrera, residente ti Barangay Sucoc Sur ti nasao nga ili.
Naammuan ti Bombo Radyo manipud iti Luna Police Station, maipagarup nga immagaw ni Llobrera iti linya ti kasinnabatna a motorsiklo a manmanehuen ti 33-anyos a ni Besas Felix Jr., ken ti angkasna a 16-anyos a ni Rovic Ocampo, agpada a residente ti Barangay Nagsabaran, ili ti Bangar idiay probinsya.
Gapu iti kinapigsa ti panagdinnungpar ket agpada a naiturong iti ospital dagiti tallo, ngem pimmusay ni Llobrera gapu ti nakaro a sugat a nilak-am daytoy iti bukodna a bagi.
