LA UNION – Agtultuloy iti isaysayangkat nga imbestigasyon ti pulisya maipapan ti pannakapapatay ti maysa a lalaki idiay abay ti maysa a canteen idiay Barangay Madayegdeg, syudad ti San Fernando, La Union itattay alas-11:40 ti aldaw.
Nabigbig ti biktima ang Reynalo Suenio, 54, residente ti Barangay Ilocanos Norte iti syudad ken agpapaay kas helper ti nasao a canteen.
Iti pannakiuman ti Bombo Radyo kenni Edna Buccat, live-in partner ti biktima, kinunana a madama daytoy nga umis-isbo idiay uneg ti kasilyas idi a mangngegna ti maysa a kanalbuong ti paltog.
Nasarakanna laengen a nakadasay ken sidara-dara ti biktima kasaruno iti panagpaarayatna kadagiti tattao nga asideg ti canteen tapno maiturong daytoy idiay ospital. Natay met laeng ni Suenio gapu ta napungtaan iti bala ti saan pay a naammuan a kita iti paltog ti rupana.
Sigun pay kenni Buccat, saanna nga ammo iti makagapu no apay a pinaltugan ti saan pay a nabigbig a suspek ti live-in na. Ipabus-oyna laengen kinunana iti Dios ken kadagiti otoridad tapno mapagsungbat iti suspek a nangpapatay iti biktima.
