LA UNION – Agyamyaman ti agassawa iti Bombo Radyo La Union ken iti maysa a house wife a nakapidot iti sling bag-da a naglaon iti P65,000 ken dagiti agkakangina nga agas gapu ta naisublin daytoy kadakuada.
Sigun iti agassawa a Mariano ken Rebecca Mariano a taga ili ti Tubo, Abra, awan iti kaibatugan ti panagbalin a napudno iti nakapidot ti bag a ni Joan Flores-Madrid iti Barangay Lingsat, San Fernando City, La Union.
Kinuna dagiti agassawa nga ikararaganda iti Dios ni Misis Madrid ken ti pamilya daytoy gapu iti panangisubli ti banag a saanna a kukua, ken uray ti Bombo Radyo a nagbalin a dalan tapno masarakan ti bag.
Kinuna met ni Misis Madrid, nakita ken innalana ti nabati a bag iti uneg ti pampasahero a jeep idi a nagturong daytoy idiay palengke tapno aggatang kadagiti school supplies para kadagiti annakna.
Idi a mangngegda ti Bombo Radyo iti pannakiuman ti agassawa a Mariano ket dagus a timmawag daytoy iti istasyon tapno ipakaammo nga isuna iti nakapidot ti mapukpukaw a bag.
Iti mismo nga istasyon ti Bombo Radyo ket nagsarak da Misis Madrid ken ti agassawa tapno ipaima dagiti napidot a banag.
Sigun pay kenni Madrid, maragsakan daytoy gapu ta naisublinan ti nasao a bag a naglaon iti dakkel a kantidad ken nginginaen nga agas a kasapulan dagiti agassawa.
Immuna iti daytoy, nagturong idi kalman dagiti agassawa a Mariano iti istasyon ti Bombo Radyo tapno ipakaammo kadagiti agdengdenggeg a mapukpukaw ti bag-da a naglaon iti kwarta a pagbayad iti utang ken dagiti agas idi a nagturong dagitoy idiay syudad ti San Fernando.
