Pinalubosan iti Senate impeachment court ni Anti-Money Laundering Council (AMLC) Secretariat Executive Director Ronel Buenaventura nga agtestigo para iti prosekusyon iti impeachment case ni Bise Presidente Sara Duterte.
Pinagkedkedan iti korte ti mosyon iti depensa a maikkat ni Buenaventura a kas testigo. Segun kenni Presiding Officer Francis “Chiz” Escudero, saan a naan-anay a protektado iti subpoena dagiti rekord ti AMLC.
Iti biang met ti prosekusyon, mabalin a maibutaktak ni Buenaventura ti rekord dagiti transaksyon nga agdagup iti P4.4B, nu sadinno ket direkta a nainaig kadagitoy ni Bise Presidente Duterte ken ti asawa na a ni Atty. Manases Carpio manipud tawen 2007 agingga 2025.
Karaman kadagitoy ti mapapati a P41M cash withdrawal ni Carpio idi Agosto 6, 2024, P319M remittances manipud China iti CALE88 Foods Corporation, ken P14.88M a gatad dagiti tseke a nakanagan kenni Duterte kas benepisyaryo.
Impaganetget ni Escudero a limitado kadagiti nasao a diskusyon iti testimonya ni Buenaventura ken mabalin daitoy a maisayangkat nga in-camera nu kasapulan. Posible met a kontraen iti depensa dagiti mailatag nga ebidensya.
