BR LA UNION – Namnamaen a pagbobotosan ita nga aldaw ti Miyerkules, Abril 29 iti House Justice Committee nu adda naan-anay a “probable cause” iti impeachment ni Vice President Sara Duterte.
Segun kenni House Justice Committee Chairperson ken 2nd District Batangas Rep. Gerville Luistro, adda ti sumagmamano a napapateg nga isyu a kasapolan pay a talantanen sakbay ti binnotosan, a pakaibilangan iti income tax returns ni Sara Duterte ken asawa na a ni Manases Carpio, ken ti maipagarop a ‘kill threat’ wenno pangta ti Bise Presidente kontra kenni Presidente Ferdinand Marcos Jr.
Maysa kadagiti naitantan nga isyu ket ti panangtalantan iti naisumite a green box ti Bureau of Internal Revenue (BIR), gaputi palagip ti ahensya a saan a mabalin a lukatan daytoy iti open session ken rumbeng a talantanen iti closed-door meeting nu daytoy ket in aid of legislation.
Kabayatanna, rimwar pay iti panagdengngeg iti report ti Anti-Money Laundering Council (AMLC) a mangibagbaga nga adda pakabuklan a P6.7 billion a maipagarop a covered ken suspicious transactions iti nagan da VP Sara ken Carpio.
Immunan a pinaglibakan iti kampo ti Bise Presidente ti nasao a report ken impaganetget da a “bloated” iti figures agsipudta maipagarop a napagtitipon iti transaksyon iti uneg ti sumagmamano a tawen.
Segun met iti Office of the Ombudsman, awan ti indeklara a cash on hand wenno bank deposits ni Sara Duterte iti Statement of Assets, Liabilities and Net Worth (SALN) na manipud 2019 agingga 2024.
Tapno makapasa idiay Kamara, kasapolan ti 106 a botos tapno mai-transmit iti Articles of Impeachment idiay Senado para iti panagusig.
