LA UNION – Dead on arrival iti Lying-in Clinic ti 4 anyos nga ubing kalpasan a bimmaliktad iti nagluganan daytoy a tricycle iti kawatiwatan ti national ti Brgy. Payocpoc Sur, Bauang, La Union.
Nabigbig iti pimmusay a ni R-Jay Bon Collado, residente iti nasao a lugar.
Maibasar iti imbestigasyon ti Bauang Police Station, agpada nga agturturong iti amianan a direksyon ti tricycle a minaneho ni Soligon Bohol, 34, addaan asawa, ken residente ti Brgy. Santiago iti ili ti Bauang ken ti SUV a minaneho ni Manolito Hidalgo, 59, addaan asawa, maysa nga abogado, ken residente ti San Fernando City.
Maipagarop a nag-overtake ti SUV idi aksidente na a madayanggos ti side wheel ti tricycle a makagapu ti panagbaliktad daytoy a pakairamanan dagiti pasahero nga isuda Fe Pang-ot, 49, addan asawa, Ryan Collado, 26, baro, ken anak na a ni R-Jay Bon, agpapada dagitoy nga residente ti Brgy. Payucpoc.
Gapu iti insidente, agpapada a naiturong dagitoy ti Bauang Lying-in Clinic no sadino saanen nga immabot pay a sibibiag ti biktima.
Agtultuloy met ti ar-aramiden nga imbestigasyon dagiti otoridad iti nasao nga insidente.
