LA UNION – Agrekreklamo iti sumagmamano a nagannak nga agpapaadal idiay Bauang North Central School gapu ta saan a naipatungpal ti napagnunummuanda a proyekto iti uneg ti classroom.
Kinuna iti maysa kadagiti nagannak nga agrekreklamo a ni Marnette Hipol-Ensierto, P250 ti kada estudyante ti grade-3 ti nasao a pagadalan ti impaay ken impaimada a kontribusyon kenni Teacher Sussie Munar para iti pannakaaramid ti book shelf iti uneg ti classroom.
Agsidsiddaaw daytoy no apay a saan pay a naipakita ti proyekto idinto ta mangrugi manen iti sabali a klase.
Sigun ti nasao a nagannak, no saan man a maaramid ti proyekto ket maisubli laengen ti kwarta a nakolekta kadagiti nagannak.
Kabayatanna, dinepensaan met ni Julie Juralbal, maysa kadagiti parent nga agpapaadal ti nasao a pagdalan, ni Teacher Munar.
Imbatad ni Juralbal a nasken nga umasideg a mismo dagiti padana a naggannak kadagiti masekna a mannursuro no adda iti parikot iti klase wenno ti maipatungpal a proyekto.
Iti sabali a bangir, impaganetget ni Teacher Munar a saanna a ginastos iti nakolekta a kwarta ken iti kinapudnona ket maipaaramid metten ti nasao a book shelf.
Nakasagana met daytoy a mangisubli ti kwarta no umasideg dagiti agrekreklamo a nagannak.
Kabayatanna, immapela met daytoy kadagiti nagannak iti nasao nga eskwelaan a mas nasaysayaat nga umasidegda laeng kenkuana wenno iti padana a teachers no adda man dagiti kayatda a saludsuden maipapan iti mapaspasamak iti uneg ti classroom.
