LA UNION – Natay kabayatan a maag-agasan idiay ospital ti maysa a baro kalpasan a maipagarup a bugbugen daytoy iti driver ken conductor iti uneg ti pammasahero a bus idiay ili ti Sto. Tomas, La Union.
Nabigbig ti 18-anyos a natay a ni Junnel Estioco, residente ti Barangay San Nicolas Central, ili ti Agoo.
Base ti imbestigasyon iti Sto. Tomas Police Station, kaddua ni Estioco iti dua pay a gayyemna nga isuda Gabriel Apostol, 24, ken Richard Laron, 37, agpada nga agnanaed idiay Agoo a naglugan iti maysa a unit ti Viron Bus Transit.
Maipagarup a nakaunget ti conductor a ni Edwin Hermoso ken ti bus driver a ni Jimmy Llanes idi kurang iti maited a plete dagiti biktima.
Gapu iti daytoy, binugbog dagiti suspek iti tallo ken imparangguyodda pay a nairuar iti lugan.
Saanen a naisalakan pay ti doktor iti biag ni Estioco gapu iti nakaro a dungir a nilak-amna manipud ti pannakabugbog, ngem agtaltalinaed pay laeng ti ospital iti maysa kadagiti biktima.
Maipagarup nga adda iti impluwensya ti arak dagiti biktima idi a napasamak ti pannakabugbog.
Iti agdama, makikikoordinaren ti pulisya iti kompanya a pagserserbian dagiti suspek maipapan iti kaso a nakairamanan dagitoy.
