LA UNION – Agtutuon a kaso iti indatag dagiti otoridad idiay piskalya kontra iti maysa a tambay a nangkursunada iti pulis idiay ili ti Tubao, La Union.
Iti report a nakalap ti Bombo Radyo manipud iti La Union Police Provincial Office (LUPPO), kaso nga illegal possesion of firearms ken frustrated murder iti sangsanguen a reklamo ti suspek a ni Richard Calamayan, residente iti nadakamat nga ili.
Base iti imbestigasyon ti pulisya, naggapu manipud iti trabaho ken paawiden idiay balayda ti biktima a ni PO1 Francisco Jeneta a nakadistino iti La Union Provincial Mobile Force Company, idi a limmabas laeng isuna kadagiti tambaynga agiinum, ngem kinursunada daytoy ti suspek.
Maipagarup a pinasarangan ti suspek iti cal .45 a paltog ti pulis ken ginandat na pay a kalbiten iti gatilyo daytoy, ngem saan a nagputok daytoy.
Napataray laengen ti biktima kasaruno iti panagkiddawna ti arayat manipud kadagiti padana a pulis.
Gapu iti daytoy, naaresto met laeng ti nasao a suspek ken nakompiskar ti iggem daytoy a paltog.
Maipagarup a nabartek ti suspek idi a ginandatna a paltugan ti pulis.
Iti agdama, nakabalud ita idiay Tubao Police Station ti suspek kabayatan a maur-uray ti pagbanagan iti kaso daytoy manipud iti pangukuman.
