Indian nat’l, naholdap idiay La Union
LA UNION – Agtultuloy a dukduktalen iti pulisya ti pakabigbig dagiti suspek a nangholdap iti maysa nga Indian national idiay Barangay Darigayos, ili ti Luna, La Union.
Nabigbig ti biktima a ni Gurmeet Ram, 36, residente ti Barangay Paringao, ili ti Bauang.
Naammuan ti Bombo Radyo manipud iti Luna Police Station, maipagarup nga iparada ti ganganaet ti motorsiklona iti igid ti kalsada tapno agturong idiay balay ni Kapitan Rolando Casipit idi nga immasideg dagiti uppat nga armado a lallaki kasaruno iti panangagaw ti P15,000 a kwarta a nakolekta daytoy manipud ti pautang.
Naparatak iti panaglibas dagiti suspek kalpasan a maala dagiti kwarta nga ikot ti biktima.
Ad-adalen met ita ti pulisya no adda ti pakainaigan ti nasao nga insidente kadagiti immuna a napasamak a panagholdap ti nasao nga ili.
