LA UNION – Agtultuloy a sapsapulen iti pulisya ti suspek a nangpapatay iti tanod kabayatan a maang-angay ti victory party iti maysa a baro a nabotosan a kagawad ti Barangay Tio-angan idiay ili ti Bagulin, La Union.
Nabigbig ti biktima a ni Reynaldo Piloy; ken ti suspek a maysa a mannalon a ni Andres Sangao, agpada a residente ti nasao a barangay.
Naammuan ti Bombo Radyo manipud iti Bagulin Police Station, killaat a naaddaan ti panagrikyar dagiti sumagmamano a lallaki a dimar-ay iti nasao nga okasyon gapu ti maipagarup a kinabartek dagitoy isu a naganawa ti biktima, ngem isuna ti nagdas-alan iti gura ti suspek ken napasamak ti pammagsol.
Naglak-am iti naduma-duma a paset iti bagina ti biktima a nagbanag ti pannakatay daytoy.
Dagus a naglibas ti suspek kalpasan ti krimen.
