LA UNION – Kinassuanen iti pulisya dagiti 11 katao karaman ti maysa a barangay kagawad ken tanod a natiliw babaen ti nagsisina nga anti-illegal drug operations iti naduma-duma a lugar idiay probinsya ti La Union.
Maysa kadagiti karaman a natiliw ket ni Kagawad Jose Ramoran Jr. iti Barangay Caliat, ili ti Balaoan.
Naaresto ni Ramoran gapu iti maipagarup a panaglako daytoy iti tallo a sachet ti maatap a shabu idiay Barangay San Franciso, ili ti Sudipen.
Umabot met iti pito a sachet ti maatap a shabu karaman ti maysa a cal .38 paltog ti narekobre manipud iti tanod a ni Ramil Florendo ti Barangay Ortiz idiay ili ti Naguilian babaen ti naisayangkat a buy bust opertion ti pulisya.
Maysa a sachet naglaon iti maatap a shabu ti naala manipud kenni Randy Abella Visaya ti Barangay General Prim East, ili ti Bangar kalpasan a gandatenna a lakkuan ti pulis a nagpammarang a customer.
Saan met nakalasat manipud iti ima dagiti pulis ti 22-anyos a baro a ni Ryan Christian Del Rosario ti Barangay Namboongan, Sto. Tomas a maipagarup a naglako iti dua a sachet ti shabu idiay Barangay San Agustin East, ili ti Agoo.
Gapu met iti maipagarup a panaglako ti maysa a sachet iti maatap a shabu ket tiniliw iti pannakabagi ti linteg ti maysa a 47-anyos a fish pen operator a ni Jeric Medriano idiay Barangay San Benito Norte, Aringay.
Arestado iti maatap a drug pusher a ni Vergil Pagnas, 22, residente ti Barangay Cares, Pugo, babaen ti buy bust operation idiay Barangay Gonzales, ili ti Tubao ken dua a sachet a naglaon iti maatap a marijuana iti nakompiskar manipud ti ikotna.
Lima a lallaki met iti naaresto gapu iti panangisayangkat ti pot session idiay Barangay Cabugnayan, ili ti San Juan.
Nabigbig dagiti suspek a maipagarup a nagsusop iti marijuana nga isuda Bernardo Macayan, 28; Eric Padua, 25; Joel Abat, 26; Benjie De Leon, 30; ken Orlando Rodriguez, 35, agpapada a residente ti nasao a barangay.
Naammuan ti Macayan ken naka-probation ita gapu ti kaso daytoy a rape.
Tiniliw met dagiti pulis ni Ronnel Amis, 33, ti Barangay Victoria, Luna kalpasan a mairaman daytoy iti riribokidiay lugarda kasaruno ti pannakaduktal nga agik-ikot daytoy iti maysa a sachet ti maatao a marijuana.
Kabayatanna, nakompiskar met pulisya manipud iti ikot ni Boy Aube, 46, ti Barangay Ortiz, Naguilian iti dua a sachet ti maatap a shabu.
Immuna iti daytoy, idi napalabas a lawas laeng ket umabot iti nasurok a 10 drug suspects ti inaresto iti tauhan iti Philippine National Police ken Philippine Drug Enforcement Agency iti naduma-duma a lugar ditoy probinsya.
