LA UNION – Aganay 30 nga evacuation centers manipud iti 13 a syudad ken ili iti intero a Rehiyon Uno iti nalukatan para iti nasurok 1-ribo a pamilya a nalayos, gapu pay laeng iti mapas-pasaran a napigsa a buyat ti tudo a gubway ti agraraira a southwest monsoon wenno habagat, a lalo pay a pinapigsa dagiti simrek a bagyo Inday ken bagyo Josie nga ita ket rumrumwaren iti teritoryo ti Pilipinas.
Dagiti nasao nga evacuation centers a kaadwan ket manipud Pangasinan iti agserserbi ita a temporaryo a pagnanaedan dagiti aganay 5-ribo nga indibidual manipud iti 1,020 a pamilya.
Ngem iti kauddian a datus ti Department of Social Welfare and Development (DSWD Region-1), addan iti nasurok 450,000 individuals a buklen ti nasurok 91-ribo a pamilya manipud probinsiya ti Pangasinan, La Union, ken Ilocos Sur iti apektado a residente.
Makitin-tinnulong met ita ti Response and Water Search and Rescue teams manipud Ilocos Sur, La Union, Bureau of Fire Protection, Philippine Army, Philippine Navy, ken Philippine National Police iti disaster response teams dagiti lokal a gobyerno idiay Pangasinan tapno tulongan dagiti residente a rumbeng a maiyakar, nangruna dagiti lugar a kangrunaan nga apektado idiay Dagupan City, ili ti Calasiao, ken Sta. Barbara.
Sipud idi Sabado, July 21 agingga iti agdama ket agtaltalinaed a naka red alert status iti Regional Disaster Risk Reduction and Management Council iti Region 1 gapu pay laeng iti dakes a panawen a mangdup-duprak iti rehiyon.
Maysa met a balay iti nailista a totally damaged idiay Adams, Ilocos Norte gaputi landslide.
