LA UNION – Nagturong iti agarup 1,000 a nabiktima iti maipagarup nga investment scam idiay istasyon ti pulisya ken National Bureau of Investigation (NBI) idiay syudad ti Urdaneta, Pangasinan tapno ireklamo ti mangimatmaton iti C and G Dry Goods a nangitaray ti nagpuunanda a kwarta.
Iti pannakiuman ti Bombo Radyo kenni Czaricee Padua, agnanaed iti syudad ti San Fernando, La Union, kinunana a nagturongda idiay Urdaneta Police Station ken NBI kalpasan a nangideklara iti bankruptcy wenno pannakaappog ti makikukua ti kompanya nga agnagan iti Sharmaine Junio Castillo nga immuna a naam-ammoda ti social media.
Idi napalabas a bulan kinunana ket agsidsiddaawda gapu ta saan nga agri-release ti insentibo ti kompanya ken adu kadagiti miyembro ti agrekreklamo.
Sigun pa kenni Padua nga adda iti siyam a group chat ti social media iti kompanya nga addaan ti sag-250 a miyembro a posible a nabiktima karaman dagiti sumagmamano nga overseases Filipino workers.
Naammuanda met manipud iti Urdaneta Police nga umabot ti 1,000 iti nagpalista ken nangidatag ti reklamo kontra iti kompanya.
Maipagarup nga umabot met iti nasurok a P60 million ti intaray ti nasao a suspek.
Iti agdama, adda iti kustudiya ti Urdaneta Police iti siyam a tauhan ti C and G Dry Goods, kabayatan a maan-anop met iti makinbagi daytoy.
