LA UNION – Agtultuloy ti isaysayangkat nga imbestigasyon ti pulisya iti napasamak a pammaltog a nakatayan iti maysa a kapitan idiay paset ti Barangay Nagrebcan, ili ti Bauang, La Union agarup alas-8:55 itattay bigat.
Nabigbig ti biktima a ni Kapitan Alejo Abuan ti Barangay Parian Este, Bauang.
Base iti nakalap nga impormasyon ti Bombo Radyo manipud iti sumagmamano a residente nga asideg ti crime scene, maipagarup a pinadaanan iti dua a lallaki a naka-helmet ken agkalubbon iti motorsiklo ti biktima nga agmanmaneho met ti bukodna a motorsiklo kasaruno iti pammaltog.
Dagus a naglibas dagiti saan pay a nabigbig a suspek kalpasan a naidasay ti kapitan.
Naiturong met iti ospital ti biktima ngem maideklara daytoy a dead on arrival ti doctor.
Naammuan nga agturong koma iti pagtataripnungan iti Liga ng mga Barangay idiay ili ti Bauang ita nga aldaw ti kapitan idi a tambangan daytoy dagiti suspek.
Kabayatanna, kinumpirma met ti Philippine Drug Enforcement Agency (PDEA) a karaman ti Abuan iti iggemda a narco-list.
