LA UNION – Agtaltalinaed a kritikal ti kasasaad iti maysa a 32-anyos a Filipina worker idiay North District hospital kalpasan a ginandatna iti agpakamatay idiay Sheung Shui, New Territories, Hong Kong (HK).
Sigun iti Hong Kong Police, sakbay a nadiskobre ti insidente ket sumagmamano a daras nga ay-ayaban iti employerna ti saanen a nainaganan a domestic helper iti uneg ti pagserserbianna a balay ngem saan daytoy a sumungsungbat.
Idi a sapulen isuna ti amona ket naduktalanna a nakabitinen iti bagi ti biktima iti uneg ti kubeta babaen ti panagaraman iti maysa a kable ti kuryente kasaruno iti panangiturong kenkuana idiay ospital tapno mataming.
Awan met iti nadiskobre a suicide note nga imbati ti biktima, ngem agparparang iti imbestigasyon a posible a ti pannakailumlomna iti utang ti problema iti Filipina worker isu a ginandatna a kettelen iti bukodna a biag.
Kabayatanna, simmarungkar met dagiti opisyal ti Overseas Workers Welfare Administration (OWWA) iti biktima a madama ita a maub-obserbaran idiay ospital.
