LA UNION – Naiturong idiay Balaoan District Hospital idiay Barangay Bungol, Balaoan, La Union iti maysa a maladaga a babai nga immunan a nasarakan idiay Barangay Victoria, Luna, La Union idi bigat ti Hunyo 18.
Babaen iti tulong ti lokal a gobyerno idiay Luna ken Municipal Social Welfare and Development Office (MSWDO) ket naipaayan ti abasto iti maladaga, a kas ti gatas, tsupon, danum, lampin, ken dadduma pay.
Iti pannakiuman ti Bombo Radyo La Union kenni Jeanette Padilla, Municipal Social Welfare and Development Officer ti Luna, nabilin dan dagiti barangay secretaries ti nasao nga ili partikular iti Barangay Victoria, tapno amwen dagiti masikog a babbai iti lugar da ken matunton nu siasino iti posible a nagpasngay idi kalman, a posible a nang-abandonar iti anak na asideg ti basuraan.
Iti agdama, segun kenni Padilla, ar-aramiden da amin a kabaelan da tapno masiguro iti salun-at ti ubing ken amin a mabalin a pagsayaatan daytoy.
Segun pay kenni Padilla, nga addan iti 15 nga indibiduwal a pakaibilangan iti pulis ken doktor, iti nangipeksa ti tarigagay a mangampon iti ubing.
Nupay kasta, binalakadan na dagitoy a kasapolan a sumurot iti proseso ti linteg, iti sidong ti DSWD.
Dagiti interesado kunana a mang-adopt iti maladaga ket kasapolan a maipasidong iti training ti DSWD tapno agbalin a registered poster parent.
