Napunuan ragsak dagiti nagannak ti security guard ken maysa nga agtagibalay gapo iti panagbalin a Top 7 ti anak da iti kalkalpas laeng nga Criminologist licensure examination.
Ni Precious Manipon Purugganan, a paset ti Government Internship Program (GIP) ken agdama a mangmangged sadiay Department of Education ket nagturpos iti Bachelor of Arts in Criminology idiay Don Mariano Marcos Memorial State University.
Iti unibersidad ket adda met ti bukod na a pammadayaw kas Top Performing School babaen ti rating a 93.22%
Nakagun-od isuna ti rating a 91.6% a nangikabil kenkuana ti puwesto kas Top 7 iti board exam dagiti Criminologist.
Napag-ammoan babaen ti panagturong mismo ti bunggoy ti Bombo Radyo La Union iti pagtaengan dagiti Purugganan sadiay Barangay Nagsabaran, San Juan, La Union a sangapulo nga agkakabsat da Precious, nu sadino walo kadakuada ket puro metlang amin professionals ken maikatlo isunan a Criminologists iti pamilya da.
Kinuna ni Precious a namnamaen nan ti panagbalinna a topnotcher agsipud ta idurduron ti review center a nagenrollan na ti mairaman kadagiti listaan dagiti nangato ti rating na.
Kabayatanna, nasukatan met ti sakripisyo dagiti nagannak na nga inladawan ti anak da kas nasingpet, nagaget, ken nasirib.
