Impasiguro ti Philippine Air Force nga adalen da ti makagapo nu apay a nagsuwek ti FA-50 fighter jet ken nagresulta pay ti pannakatay dagiti dua a piloto sadiay Mount Kalatungan, Barangay Mirayon, Talakag, Bukidnon.
Kasaruno daitoy ti kumpirmasyon manipud kenni Philippine Air Force spokesperson Colonel Maria Consuelo Castillo a pimmusay dagiti piloto nga isuda Major Jude Salang-oy ken Lieutenant April John Dadulla gapo iti aksidente a napasamak idi parbangon ti Martes.
Imbatad ni Castillo a babaen ti umiso a pannakadakamat ti rason ti panagsuwek ket maliklikan ton a mapasamak daitoy iti masangbayan.
Immuna metten a kinuna ti opisyal a maibasar ti inisyal nga impormasyon ti Philippine Army retrieval team ket nasarakanen ti lokasyon ti eroplano ken arig na saanen a mabigbig dagiti piloto gapo iti panagbettak na.
Kabayatanna, maipasidong met ti Scene of the Crime Operatives 10 ti forensic processing dagiti bangkay bayat a temporario a malamlamayan iti punerarya sakbay a maiturong sadiay Villamor Airbase a nagsebi kas main headquarters ti Philippine Air Force para ti funeral honor ken dadduma pay a pammadayaw.
