BR LA UNION – Nalpasen ti Commission on Elections (Comelec) nga iyimprenta dagiti 68,542,564 a balota a mausar inton May 12 midterm elections.
Kinuna ni Comelec Chairman George Erwin Garcia nga idi Domingo nalpasen ti panagimprenta kas iti naituding a petsa.
Gaputa nalpasen ti panagimprenta dagiti balota, kinuna ni Garcia a saanen nga awaten ti komisyon dagiti temporary restraining orders (TRO) nga inruar ti Korte Suprema tapno mainayon ti nagan ti ad-adu pay a kandidato iti balota.
Maipalagip nga idi Enero 14, impasardeng ni Garcia ti panagimprenta kadagiti balota kalpasan a nangipaulog ti Korte Suprema iti TRO a mangilaksid iti desisyon ti Comelec seknan iti panangdiskuwalipika iti maysa a kandidato a senador ken uppat a lokal a candidates.
Kinuna ni Garcia a babaen iti nasao a TRO ket naitantan ti panagimprenta ti balota iti dandani tallo a lawas.
Kinasapolan ti COMELEC nga agusar iti innem a printing machine tapno masupusopan ti backlog.
Inlawlawag ni Gaecia no apay a 68.5 million laeng a balota ti naimprenta imbes a 72 million, kinuna ni Garcia an gapu daytoy iti naitantan a parliamentary elections idiay Bangsamoro Autonomous Region in Muslim Mindanao (BARMM), inton Oktubre 13 manipud iti orihinal a May 12.
