Pinasingkedan ti Department of Justice (DOJ) a saan a nakitinnulong ti gobierno ti Malaysia iti maisaysayangkat nga imbestigasyon seknan ti panaglibas ti pagilian ni Bamban, Tarlac Mayor Alice Guo.
Kinuna ni DOJ Secretary Jesus Crispin Remulla a mabalin a madi kayat a pagsaritaan ti Malaysia ti napaot a territorial dispute ti dua a pagilian mainaig ti Sabah.
Uray anya a damag ti DOJ ket saan a mangipapaay ti detalye ti gobierno ti Malaysia nu kasatno a nakadanon ti pagilian da ni Guo.
Pakairamanan dita dagiti flight records ken detalye ti eroplano a naglugananna tapno aglibas ken makadanon sadiay Malaysia.
Maipalagip a nangisayangkat ti imbestigasyon ti Senado seknan ti panagtakas ni Guo ditoy pagilian nu sadino ket inaklon ti Bureau of Immigration a nangaramat ti backdoor ti naikkat nga mayor babaen ti panagdalyasat sadiay Tawi-Tawi nga agturong idiay Sabah.
Ni Guo wenno pagaammo pay kas Guo Hua Ping ket naaresta idiay Indonesia idi Setyembre ti napalabas a tawen kalpasan dagiti kaso na seknan ti operasyon dagiti ilegal a POGO ditoy Pilipinas.
