BR LA UNION – Siniguro ni President Ferdinand Marcos Jr. nga agsungbat iti linteg dagiti gangannaet a mangabuso iti kinasingpet dagiti Filipino.
Kinuna ti Presidente nga agserbi koma a ballaag iti dadduma a gangannaet iti nagbanagan ni Russian-American vlogger a ni Vitaly Zdorovetskiy, nga adda pakaiturongan dagiti gangannaet a makaaramid ti maikaniwas ditoy Pilipinas, dagiti bastos, ken mangabuso ti kinasingpet nga ipak-pakita dagiti Pilipino kadagiti bisita.
Impasigurado ti Presidente a mangnamnama dagiti Pilipino ti suporta kadakuada ti gobyerno, ken saan a mabaybay-an iti ar-aramiden a panangbastos ti sumagmamano a gangannaet ditoy pagilian.
Imbaga ti Presidente nga angaw man wenno saan, makapa-burek ti dara dagiti mabuy-buya a content dagiti vlogger, nga uray anya laengen iti maipakita, mang-asar, wenno mangbastos, tapno laeng makaala ti viewers.
Natural kunana ti kinasingpet dagiti Pilipino, narespeto, managpakumbaba, ken atiddog ti pasensya, ngem makapaliday nga adda dagiti mangab-abuso kadagitoy a galad ti Pilipino.
Kinuna ti Presidente nga uray pasensyado dagiti Pilipino, saan a kaipapanan daytoy a palabsen ti gobyerno dagiti nasao nga aramid.
Impaganetget ti Presidente, a rumbeng laeng a kondinaren dagiti nasao a klase ti kababalin, isunga mangnamnama ti publiko a kadwa da ti gobyerno a mangi-lugar kadagiti nasao a klase ti saan a kaay-ayu a tattao.
