BR LA UNION – Pinalagipan ti Philippine Ports Authority(PPA) dagiti biyahero seknan iti panagawit iti mul-mula iti panagturong kadagiti pantalan ken panaglugan ti barko.
Segun iti PPA, bantayan da iti panagibiyahe dagiti mula babaen iti nairut nga screening, iti tulong ti Department of Agriculture(DA) – Bureau of Plant Industry.
Balakad ti PPA iti publiko, kasapolan a maki-koordinar nga umuna dagiti biyahero iti National Plant Quarantine Services Division(NPQSD) tapno makaala ti clearance for domestic transport(CDT).
Babaen daytoy ket masiguro nga awan iti imet a ‘regulated non-quarantine pests’ dagiti maibiyahe a mula.
Inlawlawag ti PPA, nga adda dagiti mula nga addaan ti limitasyon iti pannakai-biyahe na gapu iti posible a sakit wenno peste a tugot dagitoy.
Kas pangarigan,iti mula a saba, abaka, ken dadduma pay.
Maibasar iti masursurot a regulasyon, amirisen nga umuna ti maysa a Plant Quarantine Officer(PQO) dagiti mula a plano nga ibiyahe ken mabalin a mangipatungpal iti quarantine officer ti maiparbeng a phytosanitary measure sakbay a palubosan a maibiyahe dagiti nasao a mula.
Nu madetermina nga awanan ti maiyannatop a permit, mabalin nga irekomenda nga ibati dagiti imet a mula iti pantalan, gaputa saan a mabalin a mailugan ken maisakay kadagiti barko.
Segun iti PPA, nairut iti ar-aramiden da a koordinasyon iti Dep. of Agriculture kas paset iti panangprotektar ti gobyerno iti local agriculture ti pagilian.
