BR LA UNION – Mangisay-sayankat ti tradisyunal a ‘Pabasa’ iti sumagmamano a deboto idiay Quiapo, Manila, kagiddan iti obserbasyon ti Semana Santa.
Iti pabasa ket maysa a Filipino Catholic devotion tunggal Semana babaen iti panangkanta dagiti deboto iti ‘Pasyon’, a pakaitampokan iti nagbalin a kabibiag, panagtutuok, pannakatay, agingga a nagungar ni Hesu-Kristo.
Kaadwan kadagiti deboto a makipas-paset iti pabasa ket dagiti nataengan a pamilyar iti nasao a kaugalian, ngem adu met latta dagiti mas ub-ubing a makipaspaset a naka-iggem iti kopya ti Pasyon.
Idi Lunes, Abril 14 a nangrugi iti Pabasa idiay Minor Basilica and National Shrine of Jesus Nazareno idiay Quiapo, ket isu ita ti day-daywen iti adu a deboto manipud iti National Capital Region ken manipud iti dadduma pay a kabangibang a lugar.
Maigid-giddan daytoy a Pabasa iti Visita Iglesia wenno panagturong kadagiti kangrunaan a simbaan tapno agkararag ken subliyanan iti nagbalin a panagtutuok ken sakripisyo ni Hesu-Kristo.
Masansan nga agpaut ti maysa agingga tallo nga aldaw iti pabasa a mangrugi tunggal a Lunes Santo ken agpatingga iti Biyernes Santo iti oras ti alas-12 ti aldaw wenno alas-3 ti malem.
