BR LA UNION – Inyanunsiyo ni Presidente Ferdinand Marcos Jr. iti panangipatungpal ti P10 kada litro a kissay iti presyo ti krudo para kadagiti public utility vehicle (PUV), nga addaan maximum a 150 litro kada lawas, iti uneg ti tallo a bulan.
Iti video message ti Presidente, mangrugi ti nasao a programa idiay National Capital Region iti sumaruno a lawas ken mapalawa iti sumagannad nga aldaw agingga a maipatungpal iti intero a pagilian.
Nairanta ti nasao nga addang tapno maipababa, saan laeng a ti gastos iti transportasyon ngem tapno malapdan iti panagngato ti presyo ti taraon ken dadduma pay a kangrunaan a gagatangen.
Inlawlawag ti Presidente a maipatungpal pay iti fuel subsidy kadagiti lehitimo a gasolinaan nga aprubado ken imon-monitor ti Department of Energy tapno masigueo a saan daytoy a maaabuso.
Impaganetget pay ti Chief Executive a ti programa ket paset iti panangikagumaan ti gobyerno a mapagtalinaed ti naannayas a panagbiag dagiti Pilipino ken maprotektaran ti pagsayaatan dagitoy.
Kabayatanna, nagtaripnong manen iti UPLIFT Committee idiay Palasyo ti Malakanyang tapno talantanen iti kauddian a development idiay Middle East ken epekto na iti pagilian, nangruna iti agtultuloy a panagngato ti presyo ti krudo.
Kas sungbat, inyanunsiyo ti Presidente nga ipatungpal ti Department of Transportation iti service contracting program mangrugi inton Abril 15.
Iti sidong ti nasao a programa, mabayadan dagiti operator ken driver ti P40 agingga P100 kada kilometro.
Segun iti Presidente, maipaayan met ti saan a nababbaba iti 20% diskwento dagiti commuter.
Sakopen ti programa dagiti nasurok-kumurang a 50,000 PUV, 1,000 operator, ken 15 milyon a pasahero iti intero a pagilian.
.
