BR LA UNION – Kinumpirma ti Malakanyang a mapagsasaritan metten ti pannakaipatungpal iti P20 kada kilo rice program ti gobyerno iti Luzon ken idiay Mindanao.
Daytoy ket kasaruno ti nakatuding a panangiyuswat ti P20 rice inton bigat para iti Visayas partikular idiay Cebu.
Segun kenni Palace Press Officer Atty Claire Castro, karaman iti rumbeng a maplantsa ket nu kasatnu iti agbalin a sistema iti panangibaklay ti subsidiya iti lokal a gobyerno.
Kinuna ni Castro, daytoy ti makagapo nu apay nga idiay Visayas ti umuna a pakaipaayan ti 20 pesos per kilo rice agsipudta iti nasao nga area nga immuna a nagun-od ti national government iti kooperasyon seknan iti agbalin a kontribusyon dagiti LGU iti subsidy.
Nagbalin a napaspas kunana iti panang-aprubar dagiti lokal nga opisyal idiay Visayas a tumulong dagitoy para iti pannakaipatungpal ti nalaka a bagas kadagiti umili.
Immunan nga inwaragawag ti Palasyo a tarigagay ni President Marcos nga agbalin a nalaka ti bagas a mailako kadagiti umili nangruna kadagiti nakurapay.
