Nangisubmitir ni sigud a National Police Commission (Napolcom) Commissioner Edilberto Leonardo ti counter-affidavit na mainaig ti kaso a murder ken frustrated murder a naipila kenkuana gapo iti pammapatay kenni PCSO board secretary Wesley Barayuga idi tawen 2019.
Segun iti abogado na a ni Attorney Andres Manuel, personal da nga insubmitir ti nasao a dokumento idi Biernes, Mayo 2 sadiay Department of Justice (DOJ); nagkedked metten ni Manuel nga ibutaktak ti nilaon ti counter-affidavit.
Maipalagip a ni Leonardo ken sigud a PCSO general manager Royina Garma ket maitudtudo kas masterminds para ti krimen manipud ti insayangkat nga imbestigasyon ti House Quad Committee, ngem agpada da a pinaglibakan dagiti akusasyon.
Kabayatanna, inikkan met ti DOJ ti panawen ni Garma tapno mangisubmitir ti apostilled counter-affidavit na, segun met iti abogado na a ni Atty. Emerito Quilang.
