Nangilukat ti Civil Service Commission (CSC) ti gundaway para kadagiti senior high school graduates a makatrabaho iti gobierno, kalpasan ti panangibaba da ti educational requirement para iti first-level positions kas iti clerical, custodial, trade, ken craft jobs.
Babaen ti bileg ti CSC Resolution No. 2500229 a naipasa idi Marso 6, mabalinen a makastrek ti sub-professional a trabaho ti gobierno dagiti nagturpos ti Grade 10 ken Grade 12, kasaruno ti pannakailinya da ti K-12 curriculum ti Pilipinas.
Kabayatanna, ti baro nga allagaden ket saan met a masakopan dagiti posisyon nga agkasapulan kadagiti degree wenno professional licenses.
Dagitoy dagiti baro a kwalipikasyon:
- Sigud a high school diploma
- Grade 10 finishers (manipud 2016 pangato)
- Grade 12 graduates iti TVL track wenno Grade 10 + TESDA NC II — maawat para kadagiti posisyon a sigud ket agkasapulan kadagiti vocational training wenno dua a tawen ti kolehiyo.
- Inlawlawag ti CSC a saan nga umdas ti edukasyon laeng; rumbeng a pumasa ti aplikante kadagiti sabali pay a requirements kas iti training, work experience, ken civil service eligibility. Ti pinal a desisyon ket adda latta iti hiring agency.
Ti baro a linteg ket epektibo, 15 ng aldaw kalpasan ti publikasyon na iti Official Gazette wenno kadagiti gubuayan ti damag.
