BR LA UNION – Inikkat ti Department of Education (DepEd) iti aganay 55 nga eskwelaan manipud iti Senior High School (SHS) voucher program gaputi isyu seknan iti maipagarop a ghost students wenno nonexistent student.
Daytoy iti imbutaktak ni DepEd project manager III Tara Rama idi salodsoden ni Kabataan Party-list Rep. Raoul Manuel seknan iti eksakto a bilang dagiti maipagarop a ghost student, kabayatan ti panagdengngeg ti House Committee on Basic education and Culture idi kalman, Huwebes, Marso 6.
Segun kenni Rama, aganay 22 nga eskwelaan iti na-terminate iti nasao a programa idi school year (SY) 2021-2022, 32 met idi SY 2022-2023 bayat a maysa ti na-terminate iti SY 2023-2024.
Adda pay 12 nga eskwelaan iti under investigation.
Sinalodsod pay ti mammanday linteg nu manu a vouchers ti naipaay kadagiti nasao nga eskwelaan, ngem inlawlawag ni Rama a saanen nga inpalospos ti DepEd iti P200 million a balor ti vouchers kalpasan a makita iti discrepancies manipud kadagiti nasao a pagadalan.
Inlawlawag pay ni Rama a san a maaagan a ghost student dagitoy agsipudta mabalin nga umakar dagitoy iti pribado nga eskwelaan iti umuna a bulan ngem agsubli met laeng iti pampubliko a pagadalan, agsipudta naaddaan ti problema, isunga saan a sigurado a ghost student amin dagitoy.
Maipalagip nga immuna a naipatungpal ti nasao a programa idi tawen 2015 iti tarigagay nga aramiden a mas accessible iti SHS education kadagiti nakarupay nga estudyante ken makissayan ti linnet-let iti pampubliko a pagadalan babaen iti panangipaay ti vouchers tapno makapag-enrol iti private institutions.
Nakaawat dagiti grantees ti voucher nga agbalor ti P14,000 agingga P22,500 depende iti lokasyon ti estudyante.
