Namnamaenen ni Department of National Defense (DND) Secretary Gilberto Teodoro Junior ti kumarkaro nga agresyon ti Chinese naval forces kadagiti barko ti Pilipinas nga agpapatroliya sadiay Scarborough shoal ken dadduma pay a paset ti West Philippine Sea.
Ti waragawag ni Teodoro ket kalpasan ti closing ceremonies ti tinawen a Balikatan drills idiay Camp Aguinldo, Quezon City idi aldaw ti Biernes, Mayo 9.
Daitoy ti nagbalin a sungbat ti sekretaryo kasaruno ti insidente idi Mayo 5 nu sadino ket nangisayangkat ti agresibo ken napeggad a maniobra ti Chinese frigates ken coast guard vessels kontra ti offshore patrol vessel a BRP Emilio Jacinto kabayatan ti routine maritime patrol, 11.8 nautical miles Abagatan-a-daya ti Bajo de Masinloc.
Nupay kasta, saan met a nagpaabak dagiti maseknan kadagiti aksyon ti China ket simmungbat nga agtultuloy latta dagiti naval forces ti pagilian iti panagpatrolya kadagiti kabaybayan a paset ti hurisdiksiyon ti Pilipinas.
