BR LA UNION – Napaay iti sumagmamano a lider ti Quad Committee ti Kamara de Representantes a makagun-od ti suporta iti kalkalpas a May 12 elections.
Saan a napagasatan ni Congressman Benny Abante a mangabak iti 6th District ti Manila kalpasan nga inabak ti nakalaban na a ni Joey Uy.
Nangabak ni Uy kontra kenni Cong. Abante babaen ti nasurok 1,500 votes.
Kimmandidato met ni Sta. Rosa Rep. Dan Fernandez kas gobernador ti Laguna ngem naabak kenni Sol. Aragones.
Maikatlo laeng ni Fernandez iti gubernatorial race iti nasao a probinsya kalpasan a makagun-od ti nasurok 280,000 votes idinto a ni Aragones ken nakagun-od ti nasurok 627,000 votes ken maikadwa ni Ruth Hernandez a nakaala ti nasurok 538,000 votes.
Bayat a naabot metten ni Abang Lingkod Rep. Stephen “Caraps” Paduano ti term limit na isunga saanen nga agsubli iti 20th Congress.
Iti lead chair ti Quad-Comm a ni Surigao del Norte Representative Robert ‘Ace’ Barbers ket nadanonna metten ti term limit isunga saan metten nga agsubli iti sumaruno a kongreso.
Kadagiti uppat a kongresista a nagserbi kas orihinal a co-chair ti nasao a komite, ni laeng Antipolo Representative Romeo Acop ti agserbi iti 20th Congress.
Timmaray nga unopposed ni Acop idiay Antipolo ken nakagun-od ti 131,925 votes.
Maipalagip a nabukel ti Quad Committee idi August 2024 tapno imbestigaran iti maipagarop a koneksyon ti illegal drugs trade ken Chinese drug smuggling ditoy Pilipinas, Philippine Offshore Gaming Operators, systematic police abuse, ken dadduma pay nga anomaliya a maipagarop a napasamak iti sidong ti napalabas nga administrasyon.
Daytoy ket buklen dagiti uppat a kangruaan a komite ti Kamara kas ti Dangerous Drugs, Human Rights, Public Order and Safety, ken Public Accounts.
Nupay nakairuaren ti Quad Com ti rekomendasyon kas iti panangidatag ti criminal cases kontra kenni sigud a president Rodrigo Duterte ken dadduma pay a kaalyado, saan pay a nalawag nu agtultuloy iti high-profile investigation ti nabileg a komite iti sumaruno a Kongreso.
