Inwaragawag ti Department of Tourism (DOT) a mangrugrugin a makabawi ti Pilipinas manipud ti panagbaba dagiti turista.
Kangrunaan ditoyen ti panagbaba dagiti Chinese arrivals bayat a ngimmato met ti turista manipud kadagiti nagduduma a pagilian nga idadauloan ti Middle East, Gulf Cooperation Council (GCC), ken India.
Segun kenni DOT Secretary Christina Garcia-Frasco, saan a nadanon ti target a 7.7-M Chinese tourist arrivals para ti tawen 2024 kalpasan a makailista laeng ti 5.9-M. Maysa kadagiti masirsirip a rason ti crackdown ti Philippine Offshore Gaming Operators (POGOs).
Kas sungbat ket itantandudo ti DOT ti panag-diversify ti tourism markets. Nakita ti aganay 500% agingga 800% a panaglago ti tourist arrivals manipud Middle East ken GCC gapo kadagiti a addang mainaig ti Halal ken Muslim-friendly tourism kas iti Marhaba Cove idiay Boracay ken accreditation dagiti Muslim-friendly hotels ken restaurants.
Pinapigsa pay ti DOT ti koneksyon kadagiti kangrunaan a tourism markets kas idiay South Korea, Japan, United States, Europe, ken Australia. Agtultuloy met ti panagngato ti bilang dagiti bisita manipud South Korea ken Australia gapo iti lumawlawa a connectivity ken interes iti diving, golf, beach, ken adventure tourism.
Innayon pay ni Frasco a nakasagana dagiti nagduduma a destinasyon ditoy pagilian nga umaw-awat kadagiti turista.
