BR LA UNION – Gaputi agtultuloy a panagngato ti presyo dagiti produkto a petrolyo, mariknan ti dadduma a negosyante idiay San Juan, La Union ti epektona iti negosyo dagitoy.
Segun kenni Monaliza Luebben, sigud a presidente ti San Juan Beach Resort Association, kontrolado pay laeng ti sitwasyon ken agtaltalinaed a naannayas latta ti operasyon dagiti negosyo.
Nupay kasta, aminado ni Luebben a saan a maliklikan iti epekto ti nangato a presyo ti lana iti sektor ti turismo.
Maysa nga epekto daytoy ket nu adda iti agkanselar ti booking gaputi nangato a gastos iti panagbiahe dagiti turista.
Nupay kasta, maysa a makitkita da a solusyon ditoy ket iti saan a panangingato ti abang tapno saan a makissayan ti bilang dagiti kliyenteda.
Inaklon ni Leubben a ngimmato ti presyo dagiti kangrunaan a tagilako ken suplay a kasapulan tapno mapataray ti negosyoda, ngem agsap-sapol da iti alternatibo a pamay-an tapno makasalimetmet kas koma ti panagusar ti solar lights kas enerhiya tapno makissayan ti panagusar iti koriente.
Mainaig iti daytoy, al-allokoyen da dagiti bisita ken turista nga agbalin a responsable iti panangusar kadagiti pasilidad, tapno makasalimetmet ti koriente.
Kabayatanna, kas panagsagana iti semana santa, nangangay ti San Juan Beach Resort Association iti panagtataripnong, kadwa da ti San Juan local government unit, ken dadduma pay nga ahensia.
Napagsasaritaan iti meeting dagiti addang para iti kinatalged ken seguridad, naannayas a trapiko, kinadalus ti aglawlaw, ken ti akem ti pribado a sektor a pannakataginayon ti urnos iti lugar.
