BR LA UNION – Mangrugi ita a tawen 2025, dagiti senior citizens ditoy siyudad ti San Fernando, La Union ket mangrugi da metten nga umawat iti ₱10,000 manipud National Commission for Senior Citizens (NCSC).
Partikular a makaawat iti nasao nga insentibo dagiti senior citizen nga edad 80, 85, 90, ken 95 wenno dagiti maaw-awagan nga Octogenarian ken Nonagenarians.
Mainaig ti daytoy ket inallokoy ti City Social Welfare and Development Office (CSWDO) dagiti babbaket ken lallakay nga ag-kasangay ita a tawen nga eksakto nga agtawen ti 80, 85, 90, ken 95 nga agsumite ti aplikasyon iti nasao nga opisina, para iti pannakaiproseso ken pannakaipaay iti insentibo dagitoy.
Ditoy probinsiya ti La Union, immuna a nangipatungpal ti nasao a linteg iti ili a Bauang.
Idi bulan ti Enero ti agdama a tawen, iti OSCA-Bauang ti immuna a nakai-submitir ti listaan dagiti Octogenarian, Nonagenarian, ken Centenarian beneficiaries para iti R.A. No. 11982 wenno Expanded Centenarians Act.
Maipalagip a ti inaugural payout ti nationwide cash gift distribution iti sidong ti Expanded Centenarians Act of 2024, nga indaulwan ni President Ferdinand Marcos Jr. kadwa na ti National Commission of Senior Citizens (NCSC), ket naisayangkat idiay Malacañan Palace idi Pebrero ita a tawen.
Babaen iti effort ti NCSC, namnamaen nga aganay PHP 2.9 billion a financial aid ti maibunong kadagiti aganay 275,000 senior citizens iti intero a pagilian ita a tawen.
Daytoy nga inisyatibo ket mangipakita iti dedikasyon ti gobyerno nga agtultuloy iti panangtarabay ken panangtulong kadagiti nataengan ditoy pagilian nangruna ket marigatanen dagitoy nga edad nga agtrabaho tapno suportaran iti inaldaw a pagkasapolan.
