BR LA UNION – Naisayangkat idi kalman, Agosto 19, 2026, ti turnover dagiti school materials para kadagiti iskolar iti sidong ti programa a “Batang Mahirap, Edukasyon Mo, Sagot Ko” idiay LUPPO Old Conference Room, Camp Diego Silang, Carlatan, City of San Fernando, La Union.
Kagiddan daytoy ti pannakapirma ti maysa a Memorandum of Understanding (MOU) para iti nasao a programa.
Babaen iti panangidaulo ni Police Colonel Redentor C. Ulsano, Provincial Director ti La Union Police Provincial Office (LUPPO), maitultuloy ti programa a makatulong kadagiti agkasapulan unay nga ubbing tapno agtultuloy ti panagadalda ken maragpat dagiti arapaapda iti biag.
Para iti School Year 2026–2027, adda iti 33 a benepisyaryo manipud iti nadumaduma a paset ti probinsiya ti La Union iti nasao a programa.
Karaman dagiti arwaten a naipaay kadagiti iskolar ket school supplies, bag, sapatos, ken payong.
Iti interview ti kenni PCol. Redento C. Ulsano, kinunana nga addan ti dua scholar a nagbalin a pulis a napatanur ti nasao a programa ken paset da itan iti nasao a kampo.
Namnamaenda nga umadu pay ti bilang dagiti benepisiaryo kadagiti sumarsaruno a tawen, nangruna ket agtultuloy ti suporta dagiti benefactors iti nasao a programa.
