BR LA UNION – Kinontra ti Pilipinas iti claim ti embahada ti China iti Pag-asa Island ken Pag-asa Cays ken dagiti aktibidad dagiti otoridad ti PH iti nasao a lugar.
Iti palawag manipud iti opisina ti Department of Foreign Affairs (DFA) spokesperson Ma. Theresa Daza, impaganetget ti DFA ti hurisdiksion ti Pilipinas iti Kalayaan Island Group (KIG) kadagiti mapagsusupiatan a paset ti kabaybayan.
Impaganetget na a ti Kalayaan Island Group ket napateg a paset ti PH a nabayagen nga addaan iti soberaniya ken hurisdiksion.
Kinuna pay ti ahensiya a nalawag ti karbengan ti PH a mangisayangkat iti routine maritime operations ken scientific research iti nasao a kabaybayan.
Kinunana pay nga awan ti karbengan ti China a mangbusor ken makibiang kadagiti lehitimo ken routine activities ti PH.
Innayon pay ti DFA a dagiti aktibidad ti PH iti lugar ket maitunos iti internasional a linteg, partikular ti 1982 United Nations Convention on the Law of the Sea (UNCLOS), 2016 Arbitral Award ken 2002 Declaration on the Conduct of Parties on South China Sea.
