Ad-adalenen ti gobierno ti Pilipinas iti posibilidad a panag-evacuate kadagiti Pilipino manipud Israel nga agturong sadiay Jordan babaen ti panagdalyasat iti Allenby Bridge.
Daitoy a plano ket apaman kumaro ay a lalo ti gyera ti nagbaetan ti Israel ken Iran, kas pinasingkedan ni Department of Foreign Affairs Undersecretary Eduardo de Vega.
Segun met kenni Assistant Secretary Robert Ferrer, silulukat ti rangtay ti Jordan kadagiti limitado nga oras laeng tunggal aldaw ti Dominggo, manipud alas-otso ti bigat agingga alas-dos ti malem ken mabalin laeng a mapasamak daitoy nu ti alert level idiay Israel ket naipangaton ti Alert Lever 3 wenno 4.
Iti sidong ti Alert level 3, maipatungpal ti voluntary repatriation bayat nga iti sidong met ti Alert level 4 ket katupagen ti mandatory repatriation.
Immun-una metten a pinasingkedan ti DFA nga ad-adalen dan ti voluntary ken mandatory repatriation kadagiti Pilipino nga adda sadiay Israel.
Kabayatanna, isagsagana metten ti ahensya ti contingency plan para kadagiti Pilipino nga adda sadiay Iran, pakairamanan ti posible a panag-evacuate kadagitoy babaen ti pagilian a Turkmenistan.
Ti kabangibang met a pagilian a Jordan a napagtingngaan ti gyera ti Israel ken Iran ket naballaaganen ti agingga 41,000 a Pilipino sadiay nga agtalinaed nga alerto.
Iti agdama ket dumanon met ti nasurok 30K a Pilipino ti agnanaed sadiay Israel.
