Immapela ti Embahada ti Pilipinas idiay Israel kadagiti amin a Pilipino nga agtalinaed laeng iti uneg ti pagtaengan da ken suruten dagit allagaden mainaig iti seguridad kalpasan nga ipasidong ti Israel Defense Forces (IDF) ti pagilian iti essential activity status gapo iti agtultuloy a tensyon da kontra Iran.

Babaen iti daitoy nga status ket kanselado ti klase kadagiti amin a pagadalan ken maiparit pay iti panaguummong kasta met a dagiti laeng adda iti essential services ti mapalubosan nga agtrabaho.

Naballaagan pay dagiti Pilipino a saganaan ti panagtaray kadagiti shelters, safe rooms, ken evacuation areas apaman nga adda iti missile alert. Daitoy a pammilin ket epektibo manipud alas tres, Hunyo 22 agingga alas-otso, Hunyo 23.

Maibasar iti datos ti Department of Foreign Affairs (DFA), 223 a Pilipino idiay Israel ti kumiddaw para ti repatriation, nu sadino ket 26 kadagitoy ti manamnama a mapaawid kadagiti sumaganad nga aldaw.

Maysa met ti agtaltalinaed nga adda iti kritikal a kondisyon bayat a pito ti nakaruaren ti ospital; 88 met ti bilang ti pagtaengan dagiti Pilipino ti nadadael gapo kadagiti airstrikes ken 80 kadakuada ti na-evacuate ti natalged a lugar.

Idi kallabes ket impangato ti gobierno ti Pilipinas iti Crisis Alert Level 3 ti estado sadiay Israel ken Iran. Gapo iti daitoy ket maallukoyen amin a Pilipino kadagiti nasao a pagilian nga ag-avail iti voluntary repatriation.

Kabayatanna, mabalin met a mangipatulod ti mensahe wenno tawagan ti Embahada babaen iti hotline number da: +972 54-4666118.