Suportado ti Philippine Amusement and Gaming Corporation (Pagcor) dagiti addang nga ingetan dagiti regulasyon kadagiti online gaming, ngem saan nga iti total ban wenno iti naan-anay a panakaiparit.
Daytoy iti sungbat ni Pagcor Chair ken Chief Executive Officer Alejandro Tengcoiti iti baetan dagiti panangbabalaw manipud iti Catholic Church ken dagiti sumagmanano a manmanday-linteg iti panagraira ti online gambling ditoy pagilian.
Kenunana, nasurok P100 billion iti mapaspastrekan ti gobierno manipud iti online gambling isu ta saan a rumbeng nga ipasardeng daytoy.
Immuna nga impadamag ti nasao nga ahensia a nakairekord da ti net income a P84.97 billion idi napalabas a tawen ken kagudwa ditoy wenno P48.79 billion ket manipud iti “remarkable performance” ti e-games ken e-bingo.
Segun pay iti Pagcor chief, maapektaran dagiti nasurok 32,000 a trabaho iti online gambling industry kasta met dagiti ancillary businesses no maipariten iti online gambling, pakairamanan dagiti security guards, drivers, messengers, ken negosyo para kadagiti restaurants ken sumagmamano a transportation companies.
Impaganetget ni Tengco, nga iti pudno a mangdaddadael iti industriya ket dagiti ilegal nga operators manipud kadagiti dadduma a pagilian nga iti target ket dagiti Pilipino a naissem iti sugal.
Mainaig iti daytoy ket ad-adalen ken maisapsapinal metten dagiti singasing mainaig iti online gambling ken iti maysa nga hotline a mabalin a pagtawagan ken pagkiddawan ti balakad.
Iti agdama, makikokoordinar iti Pagcor kadagiti rehabilitation centers a tumulong kadagiti adik iti panagsugal.
Mangar-aramid da metten ti AI tool wenno self-exclusion button a mabalin a pinduten no kaspangarigan naadiken iti sugal ken awtomatiko a saanen a makaay-ayam.
Kabayatanna, nakaituding nga agperma iti ahensya ti maisa a katulagan iti Ad standards council inton sumaruno a lawas tapno mabantayan ti consumer protection nonprofit group iti promosyon ti online gambling companies babaen ti billboards, telebisyon, ken dadduma pay nga advertising media.#
