Pagduduaan ni Bise Presidente Sara Duterte a nakipagsabwatan ti administrasyon ni Presidente Ferdinand Marcos Junior iti International Criminal Court (ICC) tapno ipaarestar ti ama na a ni sigud a Presidente Rodrigo Duterte seknan ti crimes against humanity nga adda pakainaigan na iti ‘war on drugs’.
Manipud iti panagbetla ni VP Sara iti Free Duterte Now rally idiay The Hague, Netherlands ket impaganetget na nga politikal a motibo motives ti adda iti likudan ti pannakaarestar ti ama na idi Marso 11 ditoy Pilipinas.
Kinunana a ti ICC ken ti agdama nga administrasyon ket nagkunsabo tapno ikkaten iti eksena iti ama na a maysa kadagiti bulgar a kritiko ni PBBM.
Innayon na pay nga awan iti umdas a basaran ti pannakadetene iti ama ni sadiay Scheveningen Prison ken dagiti extrajudicial killings (EJK) ket naibasar laeng kadagiti tsismis.
Impaganetget na a ti ICC ket makibibiang iti gobierno ti Pilipinas nga addaan iti bukod da nga “agenda” tapno mapagtalinaed iti suporta ken pondo manipud sabali a pagilian.
Kabayatanna, nagkedked met ti ICC spokesperson a ni Fadi El Abdallah nga agkomento kadagiti waragawag ni VP Duterte ken innayon nga isuda ket judicial institution ken aniaman nga isyu ket mabalin nga ipadanon iti hukom ti korte.
Iti sabali a bangir, inakusaran pay ni VP Sara ni Presidente Marcos nga agpampammarang laeng a nasingpet iti publiko kasta met nga awan met pay kunana iti pakakitaan iti naballigi a proyekto iti agdama nga administrasyon.
Agtultuloy iti panawagan ti Bise Presidente para iti madagdagos a pannakawaya-waya ken panangpasubli iti ama na ditoy Pilipinas ken inyunay-unay iti karbengan dagiti Pilipino nga agdesisyon para iti bukod a pagilian.
