Naawaten ti maysa a pamilya idiay Kidapawan City ti Balikbayan boxes da manipud Kuwait, segun iti Department of Migrant Workers (DMW).
Pagaammo a dimmanon iti tallo a tawen sakbay a naawat ni Alma Rios dagiti patulod a pagarupen dan ket napukaw.
Pinasingkedan ni Migrant Secretary Hans Leo Cacdac a dagiti kahon, kadwa dagiti kapada pay a patulod iti sabali a pamilya ket agpapada a naawaten.
Inlawlawag met ti Bureau of Customs (BOC) a natantan dagiti nasao a kahon gapo iti “miscommunication” iti nagbaetan ti freight forwarder idiay abroad ken iti local courier, mainayon pay dagiti panangallilaw dagiti sumagmamano a kompanya.
Gapo iti daitoy ket nangiyuswat da iti libre a panangipatulod kadagiti nasao a balikbayan boxes a naabandona kadagiti bodega idiay Bulacan.
Ti naballigi a turnover ket gapo iti koordinasyon ti DMW, Bureau of Customs (BOC), kasta met dagiti dadduma pay nga ahensiya ti gobierno kas maiyannurot iti napermaan a Joint Administrative Order ken Deed of Donation.
Idi bulan ti Mayo agdama a tawen ket aganay 3K a balikbayan boxes nga imbati dagiti freight forwarders ti naiyakar idiay DMW tapno maiwaras kadagiti pamilya ti OFWs.
Kas sungbat ket nangituding ti ahensya ti allagaden, kadwa ti BOC ken sabali pay a maseknan nga otoridad tapno masiguro a natalged, napartak, ken nasayaat iti pannakaipatulod kadagiti nasao a balikbayan boxes.