BR LA UNION – Umaboten iti 30 a tattao ti natay kadagiti naglabas a nagsasaruno a bagyo Crising, Dante, Emong ken hanging habagat a dimmuprak ditoy pagilian.
Segun kenni OCD officer-in-charge Assistant Secretary Bernardo Rafaelito Alejandro IV, iti nasao a bilang, siyam iti na-validate a natay manipud iti National Capital Region (NCR) ken dua idiay Region III.
Kaadwan a natay ket gaputi pannakalmes ken pannaka-kuryente.
Maibasar iti datos ti NDRRMC, adda sag-3 a natay idiay Western Visayas, Negros Island Region ken Northern Mindanao.
Saggaysa manipud MIMAROPA, Davao, Central Luzon ken Caraga region.
Maysa a natay gaputi pannaka-kuryente ket manipud Bulacan ken dua ti natupakan ti puon ti kayo idiay Camiguin ken Surigao del Norte.
Kabayatanna, imbaga ti Office of Civil Defense nga adda pito nga indibidwal ti naipadamag a mapukpukaw manipud Western Visayas, Central Luzon, Metro Manila ken CALABARZON bayat a 10 iti naipadamag a nasugatan.
Iti datos ti Office of Civil Defense, 5.2 million a tattao ti naapektaran iti napigsa a panagtudo ken panaglayos.
Gapu kadagiti nasao a didigra, naideklara ti state of calamity iti 84 a lugar ditoy pagilian tapno napartak ti pannakai-palospos ti emergency funds ken maipatungpal pay ti price freeze kadagiti kangrunaan a gagatangen kabilang ti bagas.
