Nasurok 2,500 a tattao ti pimmusay gapu iti Ebola outbreak idiay Democratic Republic of Congo, idinto nga agtultuloy ti kellaat a panagwaras ti sakit iti maysa a lugar a nalawlawa pay ngem ti France.
Segun kenni United Nations Ebola coordinator Julien Harneis, saanen a makasabay dagiti operasyon ti panagsungbat gapu iti napardas a panagwaras ti outbreak.
Agpanpanawagan pay isuna iti kanayonan a tulong agsipudta maibusen iti uneg ti sumagmamano a lawas ti agdama a pondo ti organisasyon a mangsungbat iti epidemya.
Ti agdama nga outbreak ti maika-17 nga Ebola epidemic iti Congo ken iti maudi a paset ti Hulio ket nalabsanna ti sigud a kadakkelan nga outbreak iti pagilian a napasamak manipud 2018 agingga 2020, segun iti bilang dagiti kaso a naapektaran.
Iti outbreak ket gapuanan ti Bundibugyo species ti Ebola, nu sadino awan pay ti naaprobaran a bakuna wenno agas para iti daytoy.
Kabayatanna, addan iti 160 nga health workers ti nagsakit ken 43 kadakuada ti pimmusay.
Malaksid iti virus, sangoen pay dagiti health workers ti peggad gapu kadagiti panag-atake dagiti dadduma a residente.
Kadagiti napalabas nga innem a bulan, nasurok 260 nga insidente ti panagatakar kadagiti health workers ti nairekord, pakairamanan ti walo a pimmusay.
Adda dagiti ambulansia a binarsak ken pinuuran, ken dagiti dadduma nga health facilities ket inatake gapu iti buteng ken unget dagiti residente.
Adda met dagiti dadduma a mamati kadagiti saan nga umno nga impormasyon a naaramid laeng ti outbreak.
Kabayatanna, kinuna ni Harneis a nakanayon pay iti problema ti panagpabassit iti humanitarian aid kadagiti napalabas a tawen.
Narigat met kadagiti otoridad ti mangbayad kadagiti sumagmamano a ribu a personnel a tumulong iti Ebola response gapu ta naapektaran dagiti banking services kalpasan a pinasardeng ti gobyerno dagiti commercial flights a maus-usar iti panangiyakar ti kuarta kadagiti bangko.
Gapu iti daytoy, nagpanawagan ti United Nations iti ad-adu pay a suporta tapno mapapigsa ti medical response ken malapdan ti agtultuloy a panagwaras ti Ebola.
