Dumanonen ti 92 iti bilang dagiti natay gapu iti magnitude 7.8 a ginggined a dimmayeg idiay Maasim, Sarangani, segun iti National Disaster Risk Reduction and Management Council (NDRRMC).
Adda ti 1,316 dagiti naipadamag a nasugatan, idinto a 20 a tattao ti mapukpukaw kalpasan ti ginggined idi Hunio 8.
Segun iti NDRRMC, siyam laeng kadagiti pimmusay iti kumpirmado, idinto a dagiti nabati nga 83 ket maberberipika pay laeng.
Kaaduan a naapektaran iti Region 12 nga adda ti 71 a natay, 1,236 ti nasugatan, ken pito ti mapukpukaw.
Idiay Region 11, nairekord ti 21 a natay, 79 a nasugatan, ken 13 a mapukpukaw. Adda met maysa a nasugatan iti Bangsamoro Autonomous Region of Muslim Mindanao nga agdama a maberberipika.
Agtultuloy iti validation ken assessment ti NDRRMC isu a mabalin nga agbaliw iti bilang dagiti biktima.###
